මහා වනය මැද පිහිටි මෙම ලෙන අවට නිරන්තරයෙන් සැරිසරන ගජ, වලස් ආදී වන මෘගයන්ගෙන්ද, විෂඝෝර සර්පයන්ගෙන්ද අඩුවක් නොවීය. එනමුදු උන්වහන්සේ සතු වූ අපරිමිත මෛත්‍රී බල මහිමයත්, සීල තේජසත් හේතු කොට ගෙන ඒ කිසිදු සතෙකුගෙන් උන්වහන්සේට කිසිදු උපද්‍රවයක් සිදු නොවීය.

වන සතුන් සහ තුරු ලතා සමග ඒකාත්මිකව, සොබාදහම හා මුසුව ඉතා දුෂ්කර ලෙස දිවි ගෙවමින් උන්වහන්සේ රැස් කරගත් ඒ මහා කුසල් සම්භාරය, අද දින මෙම ආරණ්‍ය සේනාසනයේ අභිවෘද්ධියට යෝධ ශක්තියක් වී ඇත. අද දින මෙම පුදබිමේ සිසිලස විඳිනා ඔබ, එදා උන්වහන්සේ සිදුකළ ඒ අසමසම කැපවීමට පුණ්‍යානුමෝදනා කරමින්, මෙම උතුම් ජාතික උරුමය මතු පරපුර වෙනුවෙන් සුරක්ෂිත කර ගැනීමට අදිටන් කර ගැනීම යුගයේ වගකීමකි.